Actualización do catálogo de arte urbana lucense

Ao abeiro do Proxecto Didáctico Antonio Fraguas, e como parte da investigación que vimos desenvolvendo nos dous últimos cursos sobre a arte urbana da cidade de Lugo, ve agora a luz unha versión actualizada da publicación dixital Arte urbana lucense. Fichas de catalogación, dispoñible na plataforma Calameo.

Esta nova edición, revisada e aumentada, inclúe vinte e unha obras máis, que nas vindeiras semanas serán trasladadas tamén á aplicación móbil da que xa falamos aquí. Os murais e graffiti incorporados, na súa maioría creados con posterioridade a xaneiro de 2022 (data da primeira versión do noso catálogo), son, por orde alfabética de títulos, os seguintes:

• Atila en Galicia, de Primo de Banksy;
• Burbulla con peixe, de Mosca;
• Busto de muller con aros, de Concepto Circo;
• Busto de muller con pelo azul, de Zësar Bahamonte;
• Cabalo alado para Fole, de alumnado do IES Ánxel Fole dirixido por Alicia Puchades Tella-Villamarín;
• Coco, de Trece Trazos;
• Darémolo comido no San Froilán?, de Davila e Mariacca;
• Don Quixote, de Trece Trazos;
• Envellece coma se foses novo/a, de Bast;
• Fogar de Breogán, de Diego AS;
• Fusión de melloras, de Dani Seek;
• Liberdade, de Concepto Circo;
• Mulleres xornalistas, de Xoana Almar;
• Muller paseando bebé, de Leandro Barea;
• Nabo, de Leandro Barea;
• Opus tessellatum, de Primo de Banksy;
• Ouija musical, de Leandro Barea;
• Para sempre, de Diego AS;
• Prímula, de Doa OA;
• Rosalía de Castro, pasado, presente e futuro, de Primo de Banksy;
• Sonsa e a verza máxica, de Yoseba MP.

Non quixemos eliminar deste inventario actualizado, que acada as noventa e tres fichas de catalogación, algúns recursos artísticos que sabemos xa desaparecidos (Pase sen chamar, Reiseñor coliazul, Socorro, Son Goku e Krilín ou Vacaloura). Os muros poden ser derrubados e as obras substituídas por outras, mais a cidade garda memoria certa da beleza que un día a habitou. A fascinación do efémero permanecerá sempre en nós.

Ana Rodríguez Barreiro