Xornada de Exhibición dos Polos Creativos
Un grupo de alumnado de 3.º ESO participou na Xornada de Exhibición dos Polos Creativos, que tivo lugar esta mañá na Cidade da Cultura (Santiago de Compostela). Os Polos Creativos constitúen unha iniciativa destinada a impulsar nos centros educativos galegos competencias dixitais como a robótica, a intelixencia artificial, a realidade virtual ou a impresión 3D. Estes espazos estarán situados nos propios colexios e institutos, que exercerán como epicentros da innovación e procurarán involucrar en diferentes proxectos a alumnado, profesorado, familias e cidadanía da contorna.
O alumnado do Ánxel Fole presentou nesta xornada dous traballos que se están a desenvolver no centro durante o presente curso e que se pretende que continúen no seguinte:
- o deseño e impresión 3D de pezas para xogos educativos da biblioteca escolar;
- a aplicación móbil baseada na revista dixital Arte urbana lucense. Fichas de catalogación, confeccionada ao abeiro do Proxecto Didáctico Antonio Fraguas e difundida a través de Calameo en xaneiro de 2022.
Mañá mesmo sairá publicada a orde para que os centros poidan solicitar o seu propio Polo Creativo. Para a escolla, a Administración autonómica terá en conta a innovación didáctica e a calidade e viabilidade do proxecto, que debe implicar a profesorado de diferentes disciplinas e fomentar a participación da comunidade educativa con actividades abertas á cidadanía. Unha vez seleccionados, os centros serán dotados do mobiliario e do material precisos.
Nieves María Martínez Vázquez e Ana Rodríguez Barreiro
Comentarios
Publicar un comentario