A periferia da periferia: mulleres que miraron ao mundo rural

O luns máis próximo ao aniversario do falecemento de Tareixa de Xesús (15 de outubro), celébrase cada ano, por iniciativa da Biblioteca Nacional de España, a Federación Española de Mulleres Directivas, Executivas, Profesionais e Empresarias (FEDEPE) e a Asociación Clásicas e Modernas, o Día das Escritoras.

A conmemoración tivo lugar, neste 2024, o 14 de outubro e o lema escollido para a ocasión foi “A periferia da periferia: mulleres que miraron ao mundo rural”, en lembranza das autoras “que mantiveron e manteñen vivo ese mundo rural e a súa cultura, ese campo, esa periferia á que, en xeral, miramos pouco e mal” (Ana Iris Simón, comisaria da IX Edición do Día das Escritoras; a tradución é nosa).

Axustándose á temática proposta, profesorado e alumnado do IES Ánxel Fole seleccionaron textos de diversa índole (líricos, narrativos, xornalísticos etc.) de autoras galegas actuais, comentáronos nas aulas e puxéronlles voz en pequenos vídeos que están a ser compartidos nas redes sociais do EDLG. Sirva a actividade para reivindicar o labor, durante séculos esquecido ou invisibilizado, das nosas escritoras e, con elas, das mulleres creadoras e transmisoras de saber popular.

Ana Rodríguez Barreiro