A fala do Fole

Alumnado de varios grupos de ESO participou o día 6 de maio no concerto didáctico "Por que cantan as mulleres?", a cargo da  pandeireteira e música de tradición oral Branca Villares, que conta con trinta anos de experiencia na práctica, investigación e divulgación da tradición musical galega. No obradoiro, centrado na tradición oral feminina, Branca Villares analizou que, como e por que cantan as mulleres. Para iso, trazou un percorrido polos distintos xéneros e temáticas das cantigas, adentrouse nos rexistros históricos e estableceu conexións entre o noso folclore e outros de Europa, África ou América. Ollando a tradición con perspectiva de xénero, reflexionou tamén sobre a presenza ou ausencia das mulleres no canon cultural, ao tempo que introduciu elementos transversais como a igualdade e a prevención das violencias. Dun xeito vivencial e lúdico, a actividade favoreceu a participación activa do alumnado, que cantou coplas, practicou percusión corporal e mesmo rematou baila...

Alumnado de 1.º BAC asistiu o 24 de abril, no auditorio Gustavo Freire de Lugo, á representación da obra  Profetas , coprodución de Ítaca Teatro e o Centro Dramático Galego. Cun texto de Ernesto Is que resultou gañador  do XVI Premio Abrente da Mostra Internacional de Teatro de Ribadavia en 2021, a peza está dirixida por Carlos Álvarez-Ossorio e protagonizada por Elea López e Carlos Rebolo. A súa sinopse,  segundo se le na web de Ítaca Teatro, é a seguinte: " Profetas presenta o encontro dunha parella que xa non o é. Dúas persoas que fan balance da súa historia común por medio doutras historias do cinema e da literatura. Cuestións como o compromiso político e artístico, o amor e a creación están presentes nunha peza que funciona como un xogo de agochados, de abismos e de saltos entre realidade e ficción. Un conto que se conta para contarnos". Ernesta Basanta Cornide, Ana Rodríguez Barreiro e Josefa Teijeiro Veiga

Dende hoxe pode verse no taboleiro da lingua do IES Ánxel Fole a exposición "Canta que cadramos ben", elaborada no IES Castelao de Vigo e editada pola Secretaría Xeral da Lingua co gallo do Día das Letras Galegas 2025. A mostra, que vén acompañada dunha unidade didáctica, trata de afondar no coñecemento das cantareiras e a poesía oral popular, así como de lle achegar o noso patrimonio musical e literario á comunidade educativa e ao conxunto da sociedade a través de materiais didácticos novos e orixinais. Ana Rodríguez Barreiro

Co gallo do Día do Libro, alumnado de distintos grupos de 2.º, 3.º e 4.º ESO participou o 24 de abril nun encontro co escritor lucense Manuel Núñez Singala. O autor reflexionou coa rapazada sobre o oficio de escribir, comentou algunhas das obras lidas este curso nos clubs de lectura do Ánxel Fole e dedicou un exemplar de Instrucións para tomar café  á biblioteca escolar do centro. Mónica Campo Vázquez, Ana Rodríguez Barreiro e Lines Salgado Iglesias

Alumnado de 3.º e 4.º ESO do Ánxel Fole asistiu o día 2 de abril, na rúa Menorca de Lugo, á inauguración da placa coa Palabra do Ano 2024: cantareira , vocábulo de plena actualidade tamén en 2025, cando o Día das Letras Galegas se dedicará á poesía popular oral. O acto institucional, organizado pola Área de Cultura, Turismo e Promoción da Lingua do Concello de Lugo, contou coa presenza de representantes da Real Academia Galega e a Fundación Barrié, colectivos vencellados á música tradicional e centros de ensino da cidade. Dende 2014, a  Real Academia Galega e a Fundación Barrié promoven, a través do Portal das Palabras , unha votación popular para escoller a Palabra do Ano. Nas edicións anteriores as elixidas foron  cibercarracho (2023), comadre (2022), tanxugueiras (2021), nós (2020), sentidiño (2019), deseucaliptización (2018), afouteza (2017), irmandade (2016) –coincidindo co centenario das Irmandades da Fala–, refuxiado/a (2015) e corrupción (2014). Ana...

Co gallo do Día da Narración Oral, que se celebra cada ano o 20 de marzo, alumnado de distintos grupos de 2.º, 3.º e 4.º ESO asistiu á sala da compañía Ítaca Teatro (Lugo) para participar no espectáculo de narración oral Instrucións para tomar café . A montaxe, a cargo de Carlos Rebolo, que se presenta como contador de historias, está inspirada na obra homónima do escritor lucense Manuel Núñez Singala, que o alumnado dos clubs de lectura do Ánxel Fole puido ler este curso. Partindo dese xeito común de hospitalidade que é ofrecer café ás visitas, a adaptación de Ítaca Teatro afonda, con moito humor e retranca, na  cotiandade galega para convertela en extraordinaria. José Ramón Negro Varela e Ana Rodríguez Barreiro

Alumnado de distintos grupos de 4.º ESO participou os días 28 de febreiro e 14 de marzo no obradoiro "Primeiro contacto co teatro", impartido por Ítaca Artes Escénicas. O taller, desenvolvido en dúas sesións de cen minutos cada unha, perseguía os seguintes obxectivos: Entender o corpo como ferramenta expresiva e comunicativa. Manifestar e identificar emocións no corpo e na voz. Fomentar o traballo en grupo, a escoita e a empatía. Estimular a creatividade, a imaxinación e a sensibilidade. Afrontar o sentido do ridículo. Algúns dos contidos que traballou a rapazada para acadar os devanditos propósitos foron: O movemento e a quietude. As emocións básicas. O espazo escénico. A construción de personaxes. A creación de escenas individuais, en parella e en grupo. Ana Rodríguez Barreiro e Lines Salgado Iglesias

O 28 de febreiro celebrouse o Entroido no centro. A xornada festiva deu comezo ás 12:50 h, cando os grupos participantes abandonaron as súas aulas e acudiron ao vestíbulo para fotografarse na instalación decorativa temática, adobiada con personaxes do entroido tradicional galego. A continuación, o alumnado dirixiuse ao patio cuberto, onde se desenvolveu o desfile de disfraces. Coreografías, música e moito humor fixeron as delicias do público, e o xurado tívoo difícil para escoller as comparsas gañadoras. Nieves Martínez Vázquez e Ana Rodríguez Barreiro

D entro das actividades desenvolvidas no Ánxel Fole para conmemorar o Día de Rosalía de Castro, celebrado neste 2025 baixo o lema "Saúde e Terra!", o alumnado de 4.º PDC participou o 20 de febreiro nunha ruta literaria por Lugo, tratando de seguir as pegadas da autora compostelá na cidade das murallas. O itinerario, trazado polas profesoras Ana Rodríguez Barreiro e Lines Salgado Iglesias, incluíu a visita aos seguintes lugares e recursos patrimoniais, relacionados en maior ou menor grao coa figura de Rosalía: 1. Mural de Concepto Circo na Escola Politécnica Superior de Enxeñaría (rúa Benigno Ledo). 2. Mural de Trece Trazos no IES Sanxillao (rolda das Fontiñas). 3. Mural de Sandra Lodi no CEIP das Mercedes (rúa Montirón), con versos da "Alborada", pertencente a  Cantares gallegos : " Arriba / todas, rapaciñas do lugar!, / que o sol / i a aurora xa vos vén a dispertar". 4. CEIP Rosalía de Castro (rúa Cambria), que leva o nome da escritora e posúe un mural re...

Co gallo da celebración do Día Internacional da Muller e da Nena na Ciencia, o alumnado de 4.º ESO da materia de Física e Química visitou, o venres 14 de febreiro, a Escola Politécnica Superior de Enxeñaría do Campus Terra da Universidade de Santiago de Compostela. Nas instalacións desta escola, a rapazada participou no obradoiro “Protagonistas, as enxeñeiras”, que pretende achegar as titulacións de carácter científico e tecnolóxico ás rapazas que están a cursar estudos de ensino medio en centros educativos de Lugo. Marina López González e Ana Rodríguez Barreiro

O alumnado de 2.º ESO asistiu o día 6 de febreiro á representación teatral O pano , da compañía Bátega Teatro. S egundo se le no portal web de venda de entradas do Concello de Lugo, a sinopse da obra é a seguinte: "Celia, nada en 1924, viviu a crueza do patriarcado ao longo do século XX e Sau vive as consecuencias do seu enquistamento nun probable devir distópico en pleno corazón do século XXI. Son dúas mulleres entre as que existe unha conexión atemporal. Celia acaba de chegar ao limbo. Lembra o ensino da II República, o terror da Guerra Civil e a posguerra, escuro período no que coñece a Mario, un maltratador que lle deixou unha fonda cicatriz. Celia afrontou esa dor desde unha heroicidade pouco convencional. Coa axuda de Soidade, a fraga, a súa horta e a forza de todas as súas devanceiras, reconstruíu a súa vida. Sau 43 acaba de fuxir por unha fendedura temporal. No ano 2040, no que vive, todas as persoas levan un microchip desde a secura do 29, todas as mulleres e boa parte do...

Durante o recreo dos martes, na aula de debuxo do centro, está a desenvolverse un obradoiro de iniciación á globoflexia, no cal, mediante a aplicación de distintas técnicas de torsión, as persoas participantes conforman figuras (animais, obxectos etc.) con globos. Impartido pola profesora Alicia Puchades Tella-Villamarín, do departamento de Artes Plásticas, o taller contribúe á socialización en galego e ao lecer saudable e creativo. Alicia Puchades Tella-Villamarín e Ana Rodríguez Barreiro

Cada 30 de xaneiro, coincidindo coa data do nacemento de Castelao, celébrase o Día da Ilustración en Galicia. Tras dedicarse nas pasadas edicións a  Álvaro Cebreiro (2017),  Camilo Díaz Baliño (2018),  Federico Ribas (2019),  Cándido Fernández Mazas (2020),  Lolita Díaz Baliño (2021),  Reimundo Patiño (2022),  María Antonia Dans (2023) e  Chichi Campos (2024), neste 2025 o homenaxeado é por primeira vez un artista vivo ―e, ademais, especialmente vencellado ao IES Ánxel Fole―: Xosé Vizoso. Deseñador e ceramista en Sargadelos, alén de cartelista, muralista e ilustrador de libros, o  mindoniense Xosé Vizoso é autor dunha obra d e gran forza visual que bebe nas fontes da imaxinaría e a cultura tradicionais galegas. Entre as súas pezas máis senlleiras atópase o mosaico mural Lembrando a Fole , que preside o patio dianteiro do noso centro e constitúe un auténtico emblema deste. O mosaico, confeccionado con teselas cerámicas brancas e negras n un es...