I Concurso de fotohaikus: a Candeloria

A tradición galega ofrece para a xornada do 2 de febreiro un rico simbolismo, máis alá de ser este o día en que se bendín as candeas nas igrexas católicas. Así, en Galicia considérase esta data como un preludio da primavera e o refraneiro popular asóciaa co casamento dos paxaros ("A partir da Candeloria, ningunha ave voa soa") e, por tanto, dalgún xeito, coa celebración do amor.

Para festexar a Candeloria, o EDLG do IES Ánxel Fole convoca o "I Concurso de fotohaikus", de acordo coas seguintes bases:

OBXECTIVO

O concurso ten por finalidade a potenciación da creatividade artística a través da conxunción da palabra e a imaxe, así como o coñecemento e a difusión das tradicións galegas vencelladas á festividade da Candeloria.

PERSOAS DESTINATARIAS

O certame vai destinado a toda a comunidade educativa do IES Ánxel Fole: alumnado, profesorado, pais / nais do alumnado e persoal de administración e servizos.

CATEGORÍAS

Establécense tres categorías:

• Categoría A: alumnado de 1.º, 2.º e 3.º ESO.
• Categoría B: alumnado de 4.º ESO e de 1.º e 2.º BAC.
• Categoría C: persoas adultas (profesorado, pais / nais do alumnado e persoal de administración e servizos).

CARACTERÍSTICAS DOS TRABALLOS

As persoas participantes escribirán, en lingua galega, un haiku (composición poética de orixe xaponesa que consta de tres versos de cinco, sete e cinco sílabas, respectivamente) sobre calquera superficie ou soporte (papel, tea, madeira, vidro, pel, terra, area, etc.) e tiraranlle unha fotografía.

Os fotohaikus, presentados en formato JPG, tratarán o tema do amor, a luz e/ou o rexurdir da natureza tras a invernía.

As obras deben ser orixinais e inéditas.

PRAZO E PROCEDEMENTO DE ENVÍO

Os traballos remitiranse, antes do 2 de febreiro de 2022, ao enderezo de correo electrónico do EDLG do IES Ánxel Fole: galegofole@gmail.com.

No asunto farase constar "I Concurso de fotohaikus" e no corpo da mensaxe incluiranse os seguintes datos:

• Nome completo do/a autor/a.
• Curso e grupo (só no caso do alumnado).
• Nome completo do/a fillo/a e mais curso e grupo en que este/a está matriculado/a (só no caso de pais / nais do alumnado).
• Categoría pola que participa.
• Correo electrónico.
• Teléfono.

PROCEDEMENTO DE SELECCIÓN

O EDLG fará unha primeira escolla entre as creacións recibidas, para o cal valorará a adecuación ao molde métrico do haiku, a corrección lingüística, a calidade literaria, a composición fotográfica, a orixinalidade da proposta, etc.

As obras preseleccionadas serán compartidas posteriormente na páxina de Facebook A fala do Fole, onde se decidirán as gañadoras de cada categoría por votación popular.

PREMIOS

Concederanse tres premios, un en cada categoría, consistentes nun bono, por valor de 30 €, para gastar na librería da cidade de Lugo que se indique.

A participación no concurso leva aparellada a aceptación destas bases, polo que aqueles traballos que incumpran algunha delas serán rexeitados. Calquera cuestión relativa á interpretación e aclaración das bases corresponde á organización.

Ana Rodríguez Barreiro