O experimento da fenda dobre de Young e o estraño caso do Dr. Jekyll e o Sr. Hyde

No marco do programa A Ponte da Universidade de Santiago de Compostela, alumnado de 2.º BAC dos institutos Ánxel Fole e Muralla Romana asistiu o pasado 4 de abril á charla “O experimento da fenda dobre de Young e o estraño caso do Dr. Jekyll e o Sr. Hyde”, impartida polo docente da Facultade de Física Carlos Montero Orille. 

Empregando como referencia o experimento da fenda dobre de Young, o profesor Montero Orille expuxo as teorías modernas sobre a natureza da luz, as cales, ao longo dos últimos séculos, foron alternando entre a hipótese corpuscular e a hipótese ondulatoria, do mesmo xeito que o personaxe de Stevenson adoptaba sucesivamente as personalidades do Dr. Jekyll e do Sr. Hyde. O relator tamén lembrou a importancia deste experimento para confirmar o carácter ondulatorio‐corpuscular da materia, isto é, a denominada dualidade onda‐partícula, concepto que, malia a súa innegable utilidade didáctica, resulta difícil de integrar nun modelo completo que describa o comportamento das partículas e da luz. Por último, fíxose unha pequena demostración cun láser e materiais doados de obter, ao tempo que se deron pautas para que calquera oínte puidese realizar o experimento na casa.

Marina López González e Ana Rodríguez Barreiro